Til gruppeleiarane for dei politiske partia i Voss Kommunestyre.
Kan innbyggarane i Voss kommune lita på politikarane?
Ved kommunesamanslåinga i 1964 vart deler av Evanger kommune slått saman med Voss Kommune tilliks med Vossestrand. Ikkje alle applauderte denne hendinga, men godtok det som vart hevda om at kommune-Noreg sto framfor store endringar og dermed større einingar i kommunestrukturen
Evanger kommune var på det tidspunkt gjeldfri, hadde bygd ny skule og hadde ein godt fungerande aldersheim med plass til 22 – 24 pensjonærar. BKK var nettopp komne til bygda og hadde starta opp med, til då, ein av dei største utbyggingane av vasskraft i landet. Dette gav grunn til stor optimisme, også her i vestre del av kommunen og store millionsummar har årleg rulla inn til Voss kommune i form av konsesjonsmidlar og skattar i no nærare 50 år. Jau då, ei viss utvikling har det vore også her, men heile tida i minimumsklassen. Det vart bygd aldersbustader (4 husvære) sist på 70-talet og ny aldersheim til 12 pensjonærar fyrst på 80-talet. Dette gav trass alt ein viss optimisme. Det vart litt seinare oppretta base for heimesjukepleie ved institusjonen. Kjøkkenet ved Evanger aldersheim har levert mat til aldersbustadane og heimebuande pensjonærar. Trongen for areal vart større og det vart avsett midlar til tilbygg. Planarbeidet var godt i gang, men like før oppstart av byggearbeidet vart midlane overførde til skulebygget på Evanger. Deretter kom lovnad om at pengane skulle tilbakeførast ved salg av Framnes kurstad. Kvar vart det av desse pengane? Slik ein ser det no, var dette berre tomme lovnader. Det kan sjå ut som eit gjennomført politisk vanstyre som har hatt som mål å gjera ei nedlegging og flytting av aldersheimen så ”fornuftig” som mogeleg.
Å gjera utkantane av kommunen endå meir utkantprega, er dårleg strategi av kommunepolitikarane. Dei har vist dette ved å nedprioritera byggefeltet i Åsen på Bolstad. Ei meir offensiv haldning mot sentrale samferdselsmynde ville høgst sannsynleg ført til at byggefeltet i Åsen hadde vore ein realitet i dag og Bolstad skule hadde hatt eit større elevtal. Vestre del av kommunen er eit framifrå utgangspunkt for arbeidspendling til Bergensområdet og er samstundes innan rimeleg reisetid til eige kommunesenter. Kommunepolitikarane burde heller marknadsføra distriktet og vera pådrivarar for å halda på grendaskulane våre, ha kort veg til barnehage og ha ein aldersheim/aldersbustad i rimeleg nært område slik at kontakten med pårørande kan oppretthaldast. Optimismen har vore stor til no.
Mange unge har valgt å busetja seg i bygda, få eller ingen hus står tomme, men får de politikarar viljen dykkar, vert dei gode grunnleggjande verdiane i
bygdesamfunnet borte og kva då? Å gjera distriktet i vest atraktivt både når det gjeld bustader og vegsamband, vil vera inntektsgjevande for kommunen og
ikkje slik politikarar og administrasjon framstiller det; ein klamp om foten. For å sitera leiaren i ”Hordaland”, ser det ut for at den vestre del av kommunen
vil verta særleg hardt ramma i nedskjeringa. Eit paradoks når ein tenkjer på at mjølkekua for velstanden i Voss dei siste 50 åra nettopp står her.
Til slutt to spørsmål til deg som politikar:
Korleis kan ein spara 1.37 mill kr berre ved å flytta Ev. aldersheim
til Hagahaugen når alle tilsette flytter med?
Kvifor denne kolossale pengemangelen no fyrste året etter at generell
eigedomsskatt er innført?
Korleis kommunen har hamna i dette uføret, tykkjer me innbyggjarane i kommunen har krav på å få vita.
Evanger / Bolstadøyri
6.mai 2012
Evanger Kvinne- og Familielag v/leiar Guri Teigen.
Bolstadøyri Kvinne- og Familielag v/leiar Anny Forthun
Nyaste kommentarar